Starbucks元祖店
每次光顧Starbucks都好勞氣，強逼症咁大聲講「要MUG，瓦杯吖！鐵匙羹！」不厭其煩．因為全世界starbucks既defualt mode就係紙杯，蓋，防熱紙套．好彩我寒底極少唔飲凍嘢，海龜宿敵飲管我唔洗用．
點解要匙羹呢？話說我多數飲打咗奶既咖啡，expresso macchiato, latte之類．飲到最後，在瓦杯裡既奶泡，倒吊都飲唔到．加埋糖就要用手指搞拌？所以都要一個匙羹．佢收咁貴，唔係洗個匙羹都唔制？最好笑佢永遠畀個大號食碟頭飯咁大隻既鐵匙我，放入expresso細細個杯度撩來撩去，好有喜劇感覺．
其實我唔係為環保，紙杯入面既咖啡係有一陣紙味係度．難飲啲．
咁基本都做唔到，扮乜嘢良心企業？
其實，去埋Starbucks元祖店，我都死心．因為，都係畀個紙杯我．諷刺既係，呢間嘢扮哂有社會良心，又話啲枱櫈邊度執番呢，只令我覺得間嘢更虛偽．
（利申，我同任何咖啡店無利益關係，只係一個勁中意飲咖啡既人．有得揀，我都會揀小店，無奈有時毒癮發作，附近無其他，就入去打支毒針）
＊＊＊
作為一個咖啡癡，到訪西雅圖一定會到位於Pike Place Market 第一間星巴克。據說，始創人在七十年代初於賣魚街市裏起家，當地人說，地址已經不同，但遊客還是前仆後繼去朝聖，店外永遠有人龍。
我逗留在店內只有幾分鐘已受不了。不到一千呎店面在美國算是「細小」，塞滿紙皮箱，店員忙亂得臉容呆滯。要追尋老星巴克味道，移玉步到附近102 Pike Street，這店標榜重構舊日風情。
分店店面夠大，推門入內店員年輕有活力。店內到處用標記寫明「星巴克精神」，大型木桌兩次差點報廢被送來再用，不少裝修材料也是別人的廢物。雪櫃裏的三文治前豎立一個告示：「每晚關店捐助給社區」，意思是剩食不會丟，會捐給弱勢社群。
據說，第一代星巴克始創人是幾個大學生hippies，他們踢着拖鞋穿爛T恤搞一間獨立咖啡店；反而將星巴克變成全球連鎖公司是另一位穿西裝的高層。俱往矣，拜訪完星巴克元祖店我更失望，咖啡淡而無味，明明我在店內用餐職員還是順手給我紙杯，這是什麼的「愛護環境」精神？
西雅圖本地人同意，星巴克咖啡質素不好，大家去光顧是貪佢夠方便。再次證明，一盤生意成功不一定是貨品好，它是看準城市人要付費買一個屋企以外的「任坐」空間，給大家去傾生意、溫習功課，那杯咖啡不過是入場費。
原刊於 2018-07-02明報副刊
（另外，幾年前我樓下果間畀我放個私人瓦杯係度，貼埋我個名上去，每次用可以攞出來，令我印象唔錯，後來又話「土地問題」逼我攞番個杯番屋企．完全係走回頭路．）
Search